អតីតបវរកញ្ញាថៃ Panadda Wongphudee ជាប់ពាក់ព័ន្ធរឿងអាស្រូវលាងលុយ! AMLO ព្រមានហាមលក់ ឬផ្ទេរទ្រព្យសម្បត្តិដែលត្រូវបានបង្កក

ដោយ៖គុជ ឥន្ទាវុធ | 3 ម៉ោងមុន ព័ត៌មានអន្តរជាតិ

បាងកក៖ ការិយាល័យប្រឆាំងការលាងលុយរបស់ថៃ (AMLO) បានចេញមុខព្រមានថា ទ្រព្យសម្បត្តិដែលត្រូវបានរឹបអូស ឬបង្កកពាក់ព័ន្ធនឹងការស៊ើបអង្កេត មិនអាចលក់ ឬផ្ទេរបានឡើយ បន្ទាប់ពីអតីតបវរកញ្ញាថៃ លោកស្រី Panadda Wongphudee បាននិយាយថា លោកស្រីនឹងពិចារណាលក់ទ្រព្យសម្បត្តិផ្ទាល់ខ្លួន ដើម្បីយកប្រាក់ទៅសងជនរងគ្រោះក្នុងសំណុំរឿងអាស្រូវពាក់ព័ន្ធនឹងការចោទប្រកាន់ពីបទលាងលុយ ឆបោក និងបទល្មើសកុំព្យូទ័រ។

យោងតាមការចេញផ្សាយរបស់សារព័ត៌មាន Khaosod ក្នុងកម្មវិធីទូរទស្សន៍ Hone Krasae កាលពីថ្ងៃអង្គារ ទី៣ ខែវិច្ឆិកា ឆ្នាំ២០២៦ លោក Ekkaphop Luangprasert មកពីអង្គការ Sai Mai Tong Rot បានលើកជាសំណួរថា តើលោកស្រី Panadda Wongphudee អាចលក់ផ្ទះ និងទ្រព្យសម្បត្តិផ្សេងៗរបស់ខ្លួនដោយស្របច្បាប់ ដើម្បីសងប្រាក់ដល់ជនរងគ្រោះបានដែរឬទេ?

ជាការឆ្លើយតប លោក Witthayaphon Chanthawat អ្នកឯកទេសស៊ើបអង្កេតហិរញ្ញវត្ថុរបស់ AMLO បានបញ្ជាក់ថា នៅពេលទ្រព្យសម្បត្តិត្រូវបានអាជ្ញាធររឹបអូស ឬបង្កករួចហើយ ទ្រព្យសម្បត្តិទាំងនោះមិនអាចលក់ ឬផ្ទេរបានឡើយ។ ជនណាដែលបំពានដោយការផ្លាស់ប្តូរ ឬផ្ទេរទ្រព្យសម្បត្តិបែបនេះ អាចប្រឈមនឹងចំណាត់ការផ្លូវច្បាប់ក្រោមច្បាប់ AMLO។

គួរបញ្ជាក់ថា លោកស្រី Panadda Wongphudee ដែលជាប្រធានមូលនិធិ Foundation for Good Deeds បានទៅដល់ការិយាល័យស៊ើបអង្កេតកណ្តាលថៃ (CIB) កាលពីព្រឹកថ្ងៃអង្គារ ដោយមានមេធាវីអមដំណើរ ដើម្បីដាក់ពាក្យបណ្តឹងព្រហ្មទណ្ឌប្រឆាំងនឹងស្វាមីរបស់លោកស្រី គឺលោក Athip Ananwattanawan ពាក់ព័ន្ធនឹងការចោទប្រកាន់ថា មានការប្រើប្រាស់ថវិការបស់មូលនិធិ ដើម្បីសាងសង់វីឡាដ៏ប្រណីតមួយនៅខេត្ត Phuket។

សំណុំរឿងនេះកំពុងទាក់ទាញការចាប់អារម្មណ៍នៅប្រទេសថៃ ខណៈមានការចោទប្រកាន់ពាក់ព័ន្ធនឹងការប្រើប្រាស់ថវិកាមូលនិធិ និងការស៊ើបអង្កេតលើទ្រព្យសម្បត្តិ។ ចំណែកការសងសំណងដល់ជនរងគ្រោះ ក៏នៅតែជាបញ្ហាដែលត្រូវរង់ចាំការដោះស្រាយពីសំណាក់អាជ្ញាធរផងដែរ៕

អត្ថបទទាក់ទង